Librazhd, nxënësit mësim në natyrë, Berisha: Arsimi shqiptar si në Europë

Në nënprefekturën e Librazhdit në fshatin Mënik nxënësit zhvillojnë mësimin në natyrë, ku jo më larg se dje kryeministri tha se është bërë një investim i madh në përmirësimin e kushteve dhe modernizimin e shkollave.

Ndërkaq nxënësit e Mënikut, çdo ditë udhëtojnë disa kilometra për tu arsimuar. Prindërit e nxënësve e ndjejnë veten fatkeq që jetojnë në këtë fshat por nuk kanë rrugë zgjidhje tjetër për momentin. Aktualisht në këto ditë të para vjeshte ata e zhvillojnë mësimin në natyrë dhe kjo e bën edhe më komike situatën, e cila vazhdon të mbetet e tillë prej disa vitesh.

Ndërsa kryeministri Sali Berisha dje gjatë inaugurimit të një shkollë 9-vjeçare në Qesarakë, ka premtuar se qeveria do të bëjë gjithçka për një infrastrukturë moderne të shkollave.

Berisha theksoi se, Shqipëria do të mund të vendoset ndër vendet më të zhvilluar, vetëm si një Shqipëri e shkollimit dhe ideve duke shtuar se për këtë përcaktues është sistemi arsimor dhe cilësia e tij.

Deputeti socialist Taulant Balla ka sulmuar ashpër qeverinë duke e akuzuar atë për mashtrim të shqiptarëve lidhur me zhvillimin e arsimit dhe Shqipërinë dixhitale, ndërkohë që si në Menik, në nënprefekturën e Librazhdit ka disa shkolla në gjendje të mjerueshme. /E.L/