Kuvendi heq imunitetin

Mazhoranca dhe opozita, ashtu sic edhe ishte paralajmëruar më herët, bashkuan votat në Kuvend për të miratuar ligjin për heqjen e imunitetit.

Ligji për heqjen e imunitetit mori 129 vota pro, 0 abstenime dhe 0 kundër. Mazhoranca rrëzoi me 63 vota kundër, kundrejt 60 atyre pro, propozimet e Partisë Socialiste për ndryshimet kushtetuese, që preknin kryesisht emërimet në Gjykatën e Lartë, atë Kushtetuese, Prokurorisë dhe Këshillin e Lartë të Drejtësisë.

Votimi i dy ndryshimeve, në atë për ligjin e konfliktit të interesave dhe në ligjin tjetër për deklarimin e pasurisë, u shoqëruan me debat mes pozitës dhe opozitës.

Deputeti socialist, Erjon Braçe kritikoi ligjin për konfliktin e interesit, posaçërisht nënin 15, pika 5/a që sipas tij ka paqartësi dhe lë shteg për abuzim.

***

Përshëndetet heqja e imunitetit

Votimi në Parlament i heqjes së imuniteteve është përshëndetur menjëherë nga Presidenti i Republikës, Bujar Nishani, i cili ndodhet në Bruksel, duke e cilësuar atë një arritje të policisë shqiptare për të garantuar barazinë para ligjit të të gjithë shtetasve shqiptarë.

Votimin e përshëndeti më pas edhe Ambasada e Shteteve të Bashkuara e cila përmes një njoftimi vetëm pak minuta pas votimit përshëndeti konsensusin e arritur në Kuvend, për heqjen e imuniteteve.

Sipas ambasadës, Kuvendi ka në fuqinë e tij mundësinë për të ndikuar në progress raportin e Komisionit Europian duke gjetur marrëveshje të mëtejshme lidhur me një masë kritike reformash përfshirë rregulloren e parlamentit si dhe ligjin për Gjykatën e Lartë.

Votimin e përshëndeti edhe ambasadori i OSBE-së, Volfarth.

***

Berisha akuza të forta ish-presidentit Topi

Kryeministri Sali Berisha mori fjalën në seancën plenare të Kuvendit kur po diskutohej paketa e Partisë Socialiste për ndryshimet kushtetuese.

Pasi falenderoi opozitën për konsensusin ndaj asaj që ai e quajti si “përpjekje shumëvjeçare” e demokratëve për të hequr barrierat për organet hetimore, pra imunitetin, kryeministri hodhi një lumë akuzash ndaj ish-presidentit Bamir Topi, ish-nënkreut të KLD-së Kreshnik Spahiu për afera korruptive gjatë kohës kur ishin në detyrë.

“Drejtësia nën drejtimin e Topi tuaj dhe ‘faqeziut’ ishte në periudhën më të errët të saj. “Cfarë bëri Topi? Cfarë ndodh sot në sistemin e drejtësisë? Shkoni flisni me gjykatës. Kam ndjerë dhimbje të mëdha, kur ata thoshin se, janë në raporte ndërkombëtare, që thonë që për t’u transferuar nga Durrësi në Tiranë duhej të paguaje 50 mijë euro”, deklaroi Berisha duke akuzuar më pas edhe opozitën se ka patur nën kontroll drejtësinë nëpërmjet ish-presidentit Topi dhe ish-nënkryetarit të KLD-së, Kreshnik Spahiu.

Deklaratave të kryeministrit Berisha, u replikoi kreu i grupit socialist, Gramoz Ruçi. Zoti Ruçi akuzoi kryeministrin për uzurpim të sistemit të drejtësisë dhe se paketa e tyre synon ta çlirojë këtë sistem nga politika.

Kreu i socialistëve në parlament akuzoi mazhorancën për lidhje me Ilir Xhakjan, vrasësi i cili pak ditë më parë në Shijak, ekzekutoi Komisarin e Policisë. Ruçi tha se Xhakja është shfrytëzuar për të mbledhur vota nga mazhoranca në kohë fushate.

“Ilir Xhakja, që deri dje e përdorje për të mbushur shportën elektorale, sot mundohesh t’ia faturosh opozitës. Më kot mundohesh. Ai guxoi ngriti dorë në mes të ditës ndaj uniformës së shtetit sepse ju e mbrojtët”, tha Ruçi.

***

Propozimet e rrëzuara të PS-së

Propozimet e PS-së përfshinin kryesisht procedurat e zgjedhjes së anëtarëve dhe kryetarëve të Gjykatës së Lartë dhe Gjykatës Kushtetuese. Mazhoranca kundërshtoi nismën e opozitës me argumentimin se këto propozime vendosin një “pakicë bllokuese”.

Por opozita mbrojti paketën e saj duke shtuar se ato garantojnë një sistem drejtësie më të pavarur nga politika. Deputeti socialist, Sajmir Tahiri, në fjalën e tij akuzoi mazhorancën dhe kryeministrin Berisha se synon kapjen e të gjitha institucioneve.

Sipas zoti Tahiri, në KLD dhe institucione të tjera të drejtësisë janë emëruar persona të lidhur ngushtë me deputetët dhe ministrat e mazhorancës. Pikërisht këtë duam të ndryshojmë, tha zoti Tahiri, duke shtuar më tej se ekziston një “pakicë bllokuese” por se ajo nuk është opozita socialiste, por mazhoranca.

***

Ruçi: Berisha ka kapur gjykatat

Kryetari i grupit socialist Gramoz Ruçi akuzoi mazhorancën se ndërsa kërkon bashkëpunimin e opozitës në Kuvend, jashtë tij ka kapur gjykatat duke mos zbatuar vendimet e tyre duke sjellë shqetësimin për Qarkun e Fierit, që ka lënë pa konstituar Këshillin e këtij Qarku.

Argumentit për dhunim të opozitës përmes drejtësisë se kapur nga pushteti Ruçi i shtoi edhe dhunën për shkaqe politike ndaj Drejtorit të Ujësjellësit Tepelenë një ditë më parë.

Gramoz Ruçi, kryetar i grupit parlamentar të PS-së: Mbrëmë në Tepelenë, megjithëse pushtetin vendor e fitoi një forcë tjetër politike, që është PS, është rrahur në mënyrë barbare dhe ndodhet në spital, Drejtori i Ujësjellësit i porsaemëruar nga bordi. Zotërinj të mazhorancës, po ua deklaroj hapur në emër të PS-së, nëse ju do të vazhdoni të kapni kështu sistemin e drejtësisë, mos kërkoni mbështetjen e opozitës për reformë në drejtësi. Nëse nuk zbatohen në këtë vend, vendimet e gjykatave të Shkallës së Parë, dytë dhe të tretë, po ua deklaroj zyrtarisht sot, nëse ju do të vazhdoni të përdorni dhunën ndaj opozitës, mos kërkoni bashkëpunim me të. Këto janë prioritetet dhe kërkesat e Brukselit. Mos kërkoni që anëtarët tanë të Komisionit të Ligjeve të japin kontributin e tyre për reformë në drejtësi kur Gjykata e Lartë, gjykatat nuk zbatojnë vendimet si rezultat i kapjes nga mazhoranca.

Kryetarja e Kuvendit, Jozefina Topalli: Sistemi i drejtësisë duhet forcuar. Reforma në sistemin e drejtësisë është prioritet dhe ne si kemi detyrim të kryejmë detyrat që sjellin nga Brukseli, përvec atyre që na duhen ne si shqiptarë. Lista e 12 prioriteteve nuk është për qeverinë, është për Shqipërinë dhe shqiptarët dhe këtu ne nuk mund të ndahemi. Të dy bashkë duhet të punojmë që drejtësia të jetë e pavarur nga paraja, jo nga politika, zoti Ruçi. Nga korruptimi dhe jo nga politika zoti Ruçi!

Debati në parlament vijoi më pas me diskutimin e amendimit të dy ligjeve, atë për konfliktin e interesit dhe atë për funksionimin e Inspektoriatit të Lartë të Deklarimit të Pasurisë.

Opozita tha se ndërhyrja në ligjin për deklarimin e pasurisë nuk është i plotë, duke argumentuar se ai nuk përfshin deklarimin periodik të bashkëjetueses apo bashkëjetuesit të zyrtarit të lartë që ka detyrues deklarimin.

Erjon Braçe shtoi se në ligj nuk është përcaktuar argumentimi i pasurimit të zyrtarëve të lartë, pasi amendimi parashikon vetëm deklarimin e origjinës së pasurisë.

Deputetët e opozitës shtuan edhe të tjera kritika për dy projektet, ndërsa theksuan se dy ligje për deklarimin e pasurisë dhe ai për konfliktin e interesit kanë kundërshti me njëri-tjetrin.

Në mungesë të Ministrit për të mbrojtur ndryshimet në ligj, opozita deklaroi se seanca është e jashtëligjshme pasi është në kundërshtim me Rregulloren e Kuvendit që detyron anëtarin e kabinetit që ka firmosur ndryshimet në ligj të jetë i pranishëm në seancë.

Gjithsesi, në fund të seancës, dy ndryshimet në ligjin për deklarimin e pasurisë dhe në atë për konfliktin e interesit morën vota edhe nga opozita.

***

Policia "zë" mend

Pavarësisht se nuk ishte lajmëruar asnjë tubim, përpara seances plenare të Parlamentit, forcat policore te komisariatit numër 1 kishin marrë masat respektive për ruajtjen nga ndonjë incident i mundshëm i paralajmëruar nga Shoqata e të Perndjekurve Politike.

Survejimi i zones ne nje perimeter te konsiderueshem rreth godines se Parlamentit eshte bere me forca te Policise se Rendit. Ne nje dite te zakonshme keto forca vendosen te pakta ne numer kur Drejtoria e Policise se qarkut Tirane, japin leje per tubime.

Nje rast i tille ka qene edhe ajo e te enjtes se kaluar, kur ato u gjenden te papergatitura, kur dy ish-te perndjekur politike qelluan me qese mielli automjetin e Kryeministrit te vendit.

Incident ky qe pasoi me nje numer te larte te pezullimeve nga detyra, te punonjesve qe ndodheshin ate dite ne detyre si edhe verejteje te renda per disa nga drejtuesit e komisariatit, te cilet kane nen juridiksion zonen, ku eshte e vendosur godina e Parlamentit.