Laç, rrëmbeu 16-vjeçaren dhe e përdhunoi nën kërcënimin e armës

Sat 6 Oct 2012 - 14:30

Momente të tmerrshme ka përjetuar një gjimnaziste 16-vjeçare nga Laçi, e cila u rrëmbye dhe u përdhunua nga një 26-vjeçar.
Adoleshentja me inicialet E. GJ. u rrëmbye me forcë në rrugë, gjatë momentit që po shkonte për në shtëpi.
Agresori e futi me forcë në makinë, e mbajti një natë të tërë ku e shfrytëzoi seksualisht dhe më pas e la të lirë.
Ngjarja ndodhi pasditen e së enjtes rreth orës 17:00 në qytetin e Laçit. Burime policore bëjnë me dije se përdhunuesi është shtetasi K. Tirtja, 26 vjeç, nga fshati Zhejë i rrethit të Kurbinit. Minorenia po shkonte në banesën e saj në lagjen nr. 3 të Laçit, kur ai i është shfaqur përpara dhe nën kërcënimin e armës e ka detyruar të hyjë në makinën e tij.
Më pas, ai ka shkuar në periferi të një fshati pranë fshatit ku banonte dhe e ka kaluar gjithë natën në makinë, bashkë me gjimnazisten fatkeqe.
Në orët e para të mëngjesit, agresori e ka lënë 16-vjeçaren në hyrje të qytetit të Laçit duke e kërcënuar se në qoftë se do të shkonte në polici për denoncim, do të hakmerrej.
Kur u kthye në shtëpi, minorenia u përball me prindërit e shqetësuar për “zhdukjen” e saj. Ajo u detyrua të tregonte të vërtetën dhe ata iu drejtuan komisariatit të policisë.
Blutë e Laçit bënë të mundur arrestimin e agresorit, si dhe sekuestrimin e një automatiku dhe makinës së tij. Tashmë ai do të përballet me drejtësinë. /alb-observer.com/