Marijuana bie nga xhepi i prokurorit në Gjykatë

.
Një prokuror në Nju Orlins, SHBA, ka dhënë dorëheqjen pasi një cigare marijuane ra nga xhepi i tij para se të hynte në një seancë gjyqësore, ndërsa ai po fliste me një oficer Policie.
Xhejson Kentrill po bisedonte me një oficer në gjykatën “Orleans Parish” kur ndodhi ngjarja, sipas gazetës lokale “Times-Picayune”.
Sipas kësaj gazete, polici por edhe prokurori kishin shqyer sytë kur cigarja ra në tokë, pastaj ishin parë në sy, dhe më pas polici e kishte marrë atë për ta analizuar në rajon.
Kentrill, 43 vjeç, i cili menjëherë dha dorëheqjen, u lirua me garanci pas akuzës për “shkelje të vogla për përdorim të marijuanës”.
Gruaja e tij, Latoja Kentrill, e cila kandidon për anëtare e Këshillit Bashkiak të Nju Orlinsit, tha për mediat se: “Unë absolutisht nuk i justifikoj veprimet e tij.
E dua burrin tim pa kushte dhe jam e shqetësuar për shëndetin e tij. Shpresoj që ky incident do ta inkurajojë Xhejson të kërkojë ndihmë profesionale”