Milani, 24 milionë euro për Guardiolën

Guardiola është njeriu i përzgjedhur nga Milani për të kaluar krizën që po përjetojnë kuqezinjtë në këtë fillim sezoni.

Sipas të përditshmes “La Repubblica”, tashmë janë realizuar kontaktet e para midis presidentit Silvio Berlusconi dhe ish-trajnerit të Barcelonës, të cilit do t’i besohet projekti i “ringjalljes” së klubit.

Takimi duket se ka ndodhur në Nju Jork, ku Guardiola është zhvendosur për të jetuar gjatë këtij viti.

Nëse do të pranojë, spanjolli do të vendoset në krye të shtatë herë kampionëve të Europës duke nisur nga sezoni i ardhshëm, ndërsa sipas “La Republicca”-s, ai do të përfitojë gjashtë milionë euro në sezon, nëpërmjet një kontrate me kohëzgjatje 4-vjeçare.

Ndërkohë, sipas të njëjtës gazetë, me pozitat e trajnerit të tanishëm, Massimiliano Allegri, gjithmonë e më të lëkundura, klubi ka filluar të mendojë për shkarkimin e tij dhe besimin e klubit në duart të ish-legjendave, si Paolo Maldini apo Roberto Baggio, të cilët duhet të drejtojnë Milanin deri në fund të këtij sezoni tranzicioni.