Moto GP, Stoner nuk do të ndihmojë Pedrosan

Casey Stoner, i cili do të rikthehet të garojë në Moto GP pas dëmtimit që pësoi në muajin gusht, bëri të qartë se nuk ka ndërmend të ndihmojë shokun e tij të skuderisë tek Honda, Dani Pedrosa, në fitimin e titullit kampion.

“Honda nuk më ka thënë asgjë për këtë çështje dhe nuk besoj se do të më thonë. Kampionatet fitohen në mënyrë të drejtë dhe jo me ndihmën e të tjerëve”, deklaroi australiani, kampion bote në fuqi, por që matematikisht ka humbur shpresat për titull këtë sezon pasi mungoi në disa gara për shkak të dëmtimit në kavilje.

Stoner u shpreh i lumtur që do të ngjitet sërish mbi motor: “Jam i gëzuar për rikthimin. Nuk doja që sezoni im i fundit në Moto GP të shenjohej nga dëmtimi, mungesa në disa gara dhe dalja nga lufta për titull, por ajo që ka ndodhur nuk kthehet dot më.”

Provat zyrtare të Cmimit të Madh të Japonisë do të zhvillohen të shtunën në orën 07:00, ndërsa gara të dielën, në të njëjtën orë.
/T.ch