Vetura që kalon 1 600 kilometra në orë

Kjo që shihet në foto nuk është aeroplan ndonëse “fluturon” në tokë më shpejt se shumica e aeroplanëve. Ky është “automobili-raketë”, që po e konstrukton australiani Rosco McGlashan dhe që do të “fluturojë” 1 600 kilometra në orë, duke thyer çdo rekord të deritashëm shpejtësie.Shoferi i pasionuar i shpejtësive ekstreme ka prezantuar sot në Sydney pjesë të veturës së tij të quajtur Aussie Invader 5R, që do të ketë 200 000 kuaj fuqi.

Ai planifikon që me këtë veturë të arrijë shpejtësinë prej 1 600 kilometrash në orë, që është shpejtësi më e madhe se ajo e plumbit të pushkës.

Për të përmbyllur projektin, atij i duhet ende kohë. McGlashan planifikon që provën e parë ta bëjë në vitin 2014, transmeton Albinfo.

Rekordin e tashëm për automobilin më të shpejtë në botë e mban prej 15 vjetësh britaniku Andy Green. Ai e ka arritur shpejtësinë prej 1 228 kilometra në orë, që është pak më shumë se shpejtësia e zërit.