Gjirokastër, bllokohen 200 kg marijuanë

Policia në qytetin e Gjirokastrës ka sekuestruar mëngjesin e së enjtes një sasi lënde narkotike prej 200 kilogramë marijuanë.

Lajmin e bëjnë të ditur burime policore, sipas të cilave transportuesi i sasisë së drogës ka arritur të arratiset duke u shpëtuar prangave.

Burimet saktësojnë se bëhet fjalë për një të ri 24-vjeçar, i cili braktisi makinën sapo pa uniformat blu dhe që tani është shpallur në kërkim.

Autoritetet policore shtojnë më tej se, droga ishte e ndarë në 200 pako me nga 1 kilogramë marijuanë secila dhe se si destinacion përfundimtar kishte Italinë.

Një ditë më parë, në një operacion të ngjashëm, policia e Gjirokastrës sekuestroi 30 kg marijuanë dhe këtë herë arriti të kapte transportuesit.

Ata ishin vëllezërit Iqmet dhe Vladimir Ibrushi, nga Berati, të cilët u kapën në flagrancë me sasinë e drogës në zonën e Hormovës.

Në këtë rast policia lokale bëri të ditur se droga vinte nga Lazarati dhe do të transportohej në Tiranë.

Ndërsa sasia më e madhe e konfiskuar së fundmi ishte ajo prej 883 kilogramësh kanabis nga autoritetet helene në kufirin shqiptaro-grek, në zonën malore të Gumenicës.

Policia njoftoi më herët gjatë muajit se sasia e narkotikëve ishte vendosur në 25 thasë të fshehur me kujdes në disa shkurre dhe ruhej nga pesë persona të armatosur me kallashnikovë dhe karabina.

Anti-droga greke kishte vënë në monitorim zonën, pasi prej ditësh kishte marrë informacion se persona të panjohur dërgonin lëndë narkotike të ngarkuar në kafshë nga zona malore që ndan dy vendet në drejtim të zonës së Filatit.

Nuk mbaron droga aty jo