Mitrovice, perkujtohen 10 shqiptaret e vrare 13 vjet me pare

Për veriun e Mitrovicës është diskutuar edhe në një tryezë të organizuar nga Lëvizja Vetëvendosje, në të cilën janë përkujtuar 10 shqiptarët e vrarë 13 vjet më parë. Aty është thënë se vrasja dhe spastrimi etnik i shqiptarëve nga ajo pjesë e vendit ndërmjet datës 3 dhe 4 shkurt të vitit 2000 është kryer nga grupi kriminale serb, i njohur si “Rojat e Urës”, transmeton KTV. Raste të tilla, sipas të pranishmëve vazhdojnë të ndodhin edhe sot e kësaj dite në atë pjesë të vendit.

“U tha se pas bombardimeve të NATO-s u lirua edhe qyteti i Mitrovicës, por kjo nuk ndodhi as për 13 vjet”, ka thënë Halit Berani, kryetar i Këshillit për mbrojtjen e të drejtave dhe lirive të njeriut në Mitrovicë. Ai përgjegjës direkt bën forcat e KFOR-it francez dhe policinë e UNMIK-ut. Ndërkaq, Shpend Ahmeti nga Lëvizja “Vetëvendosje” ka thënë se, këto vrasje dhe dëbime u bënë me direktivat e Beogradit, ku në udhëheqje të shtetit serb ishin pikërisht njerëzit, të cilët sot janë në krye të tij dhe qeveritarët kosovarë dialogojnë me ta pa asnjë kusht. 13 vjet pas ngjarjes, nga Veriu i vendit janë larguar më shumë se 11 mijë banorë shqiptarë, ndërkaq të kthyer dhe që vazhdojnë të jetojnë në atë pjesë të vendit janë rreth 4 mijë.