Tiranë, nuk merr dhuratë për Shën Valentinin, i djeg makinën të dashurit

Dy automjete janë djegur mëngjesin e sotshëm në një parking në rrugën “Muhamet Gjollesha” në kryeqytet. Një prej tyre është e tipit Chevrolet, kurse makina tjetër ka targa të Maqedonisë.

Burimet policore bëjnë me dije se zjarri i është vënë qëllimisht makinës Chevrolet, por nga përhapja e tij është djegur edhe mjeti me targa maqedonase që ndodhej pranë.

Nga hetimet paraprake, mësohet se zjarrin makinës ia ka vënë një femër, e cila donte me këtë mënyrë ta ndëshkonte të dashurin e saj, i cili nuk i bëri dhuratë për Shën Valentinin. Chevrolet është djegur krejt, kurse makina tjetër pjesërisht. Policia vazhdon hetimet, ndërsa nuk ka bërë publike emrat e personave të përfshirë në këtë incident. /alb-observer.com/