Përleshje në mes të rinjve të PDK-së?

Nga kuvendi zgjedhor në Rininë Demokratike të Kosovës, në lagjen “Arbana” në Prizren, është duke qarkulluar informacioni se ka pasur përleshje në mes kryetarit aktual të të rinjve të kësaj partie dhe kandidatit për kryetar të ardhshëm.
Në këtë rast i dëmtuari thuhet të jetë Nexhmedin Krasniqi, anëtar i RDK-së në Prizren.

Krasniqi thotë se është kandidat për kryetar të RDK-së në Prizren, por kryetari aktual, Samir Hoxha, thotë se për këtë kandidatur është njoftuar përmes mediave dhe se për këtë çështje janë disa procedura që duhen ndjekur.

Megjithëse Krasniqi thotë se posedon certifikatën nga mjeku për lëndimet e marra nga Hoxha, Sami Hoxha mohon ta ketë goditur dhe se, sipas këtij të fundit, kanë qenë disa metra larg njëri tjetrit.

Krejt këto fjalë, thotë Hoxha, kanë filluar pas përfundimit të kuvendit zgjedhor të kësaj dege, i cili sipas tij ka rrjedhur normalisht. Përveç kësaj, Nexhmedin Krasniqi thotë të ketë bërë edhe kallëzim penal për këtë çështjem , transmeton Kosovapress.

Në një reagim për medie të Rinisë Demokratike të Kosovës, dega në Prizren thuhet se Dega e RDK-së në Prizren,distancohet nga deklarimet e Krasniqit se gjoja dikush brenda kryesisë së degës, ka për qëllim manipulimin e zgjedhjeve rinore.

“Gjithashtu pretendimet e z. Krasniqi se gjoja ai ka rivalitet me kryetarin aktual të Rinisë Demokratike dega në Prizren, nuk qëndrojnë, sepse kryetari Hoxha është deklaruar me kohë se ai nuk do të jetë kandidat për kryetar të rinisë e as për kryesinë e degës”, thuhet në reagim. /Telegrafi/