Vrasja në Shkodër, babai: Fisin tonë e mbuloi turpi

Vrasja në Shkodër që ndodhi vetëm për një copë tokë ka tronditur fisin Muri.

Me kokën ulur, babai i viktimës, Mark Muri shpreh indinjatën e tij, duke thënë se kjo që ka ndodhur i vendos vulën e turpit fisit Muri. Ndërkohë, policia pa kaluar 24 orë nga ngjarja tragjike ka zbardhur ngjarjen.

Konflikti mes 54-vjeçarit Nikë Muri dhe nipave të tij ka marrë shkas për një copë tokë. Mësohet se 33-vjeçari i sapomartuar kishte nisur të ndërtonte një shtëpi të re në hapësirën mes dy shtëpive.

Ky fakt ka bërë që të reagojë Nika me djemtë e tij dhe herë pas here ka pasur sherre. Ndërkohë që konflikti i së mërkurës kishte lindur nga një çështje banale, pasi lopa e njërës shtëpi kishte ngrënë hardhitë e shtëpisë tjetër.

Në sherr e sipër, 23-vjeçari Çesk Muri i ndihmuar nga babai i tij ka vrarë kushëririn e tij, Gjinin./alb-observer.com/