Durrës, zjarr në një pallat, policia shpëton 4 persona të rrezikuar nga flakët

DURRES – Një zjarr i fuqishëm ka shpërthyer në katin e katërt të një pallati pranë Drejtorisë së Policisë në Durrës. Sipas policisë, dyshohet se shkak i rënies së zjarrit ka qenë shpërthimi i një bombole gazi në banesën e një çifti pensionistësh. Tymi është përhapur në të gjithë pallatin, duke rrezikuar asfiksimin e banorëve.

Falë ndërhyrjes së shpejtë të efektivit të policisë Aleks Kalemi është bërë e mundur që të shpëtohen dy fëmijë të mitur, 4 dhe 7 vjeç. Policia i ka dërguar fëmijët në spital, në gjendje asfiksie, por fatmirësisht jashtë rrezikut për jetën. Policia ka arritur të nxjerrë në kohë nga godina edhe çiftin e pensionistëve, të cilët janë lënduar lehtë.

Banorët e pallatit tashmë janë evakuuar. Falë ndërhyrjes së zjarrfikësve flakët janë vënë nën kontroll, ndërsa po punohet për shuarjen e plotë të zjarrit.
Balkanweb