Veterani luftës që e braktisi atdheun për bukë

I biri, Altini, “Kurrë më nuk do të mund të të thërrasë baba”. Samir Dulaku aksidentalisht u mbytë në Zvicër

Kishte shkuar prej më se dy vjetësh në Zvicër, për ti dhënë fund varfërisë së padurueshme, por edhe përçmimit dhe gjithçkaje tjetër që nuk e pranon një burrë, veçmas një hero lufte. Rruga e vështirë e shkuarjes në Zvicër, vështirësia edhe më e madhe për të gjetur punë, dhe sidomos për ta mbajtur atë, e kishte detyruar të shmangte maksimalisht kthimin në shtëpi duke detyruar çdo mall, thirrje, qeshje dhe ngrohtësisë që ta jep familja. Këto duket se ishin motivet që do ta çonin drejt një jete tjetër ish ushtarin e UÇK-së Samir Dulakun.
Por, jeta e tij dhe shpresat ishin të shkurtra, pavarësisht që ia ndryshoi jetën familjes sa ishte duke punuar në Zvicër, ëndrrat u ndërprenë nga një tragjedi e papritur.
Gjatë ditës së mërkurë, vetëm një javë pasi që i mori jetën një aksident fatal në Zvicër, iu dha lamtumira e fundit, ish-ushtarit të Ushtrisë Çlirimtare të Kosovës, Saimir Dulaku. Ai është varrosur në fshatin e tij të lindjes, në Opterushë të Rahovecit.