“Një kafe”= 7 euro,“Mirëdita, një kafe ju lutem”=1.40 euro

• Sa më i sjellshëm tregoheni kur porosisni, aq më pak do paguani

Doni që të kurseni para nga xhepi juaj kur pini kafe? Atëherë tregohuni të sjellshëm kur e porosisni kafen dhe do ta shikoni që do keni “goxha fitim”.

Një kafene në jug të Francës ka nxjerrë një rregull të ri. Në qoftë se ju shkoni në lokal dhe porosisni një kafe në mënyrë brutale, jo me mirësjellje, atëherë çmimi që ju duhet të paguani është pothuaj dyfish më i lartë nga ai që do të paguanit, në qoftë se do ta porosisnit me mirësjellje.

Në lokalin e quajtur “The Petite Syrah café”, në Nice të Francës, kur ju porosisni duke thënë “një kafe”, kushton shtatë euro, ndërsa kur ju thoni “një kafe ju lutem”, atëherë do të paguani vetëm 4.25 euro.

Por ka akoma më tepër. Në qoftë se ju thoni “mirëdita, një kafe ju lutem”, fatura do t’ju vijë 1.40 euro. Atëherë ia vlen mirësjellja? Përgjigjen mendojeni vetë!

Fabrice Pepino, menaxheri i “Petite Syrah”, thotë se e gjithë kjo nisi si një lojë në fillim, sepse njerëzit në kohën e drekës janë shumë të stresuar dhe shpeshherë jo të sjellshëm me kamerierët, por tani ky është bërë një rregull i pashkruar për disa kafene në Francë.

/Shekulli Online/ E.B./