Çka duhet të dijë fëmija që rri vetëm?

Çka duhet të dijë fëmija që rri vetëm?



Duke i ushtruar fëmijët që të qëndrojnë vetëm në shtëpi, ju ushtroni vetëqëndrimin e tyre. Kur fëmijët janë vetëm, ata ndërtojnë pavarësinë e tyre, ndjenjën e përgjegjësisë dhe teknikën e gjindshmërisë praktike. Por, për të qenë e gjitha siç duhet, ja disa këshilla të cilat mund t’ju ndihmojnë.
Pas moshës 12-vjeçe, mund të filloni ta mësoni fëmijën që të qëndrojë vetëm në shtëpi. Ndarjet e para duhet të fillojnë ngadalë dhe me maturi. Së pari shkoni deri në ndonjë dyqan apo ndonjë vend tjetër, të cilin fëmija di që është afër shtëpisë suaj.
- Çka duhet të bëni?: Sigurohuni që fëmija juaj është i gatshëm të kujdeset për vetveten kur ju nuk jeni pranë tij. Gjithmonë duhet të jeni në dijeni se ku e keni fëmijën, me kë është dhe çfarë bën. Mësoni fëmijën tuaj me rregullat e sigurisë:
- Kë ta telefonojë në raste urgjente.
- Në rast rreziku, si të shpjegohet nëpërmjet telefonit se ku ndodhet vendbanimi juaj.
- T’ju telefonojë sa herë që të mbërrijë në shtëpi.
- Se si t’i mbyllë dyert dhe dritaret, dhe alarmin e sigurisë po që se e keni.
- Që në asnjë rast të mos e lejojë askënd të huaj të hyjë në shtëpi pa lejen tuaj.
- Që personit që troket në derë të mos i tregojë që është i vetëm në shtëpi.
- Që çelësin e shtëpisë ta mbajë në vendin ku nuk mund t’i humbet.
- Si të reagojë në rast zjarri.
- Që të mos hyjë në shtëpi po qe se dyshon që diçka nuk është në rregull - p.sh. derën e lënë hapur, dritare e thyer…
- Që t’ju telefonojë, nëse diçka e frikëson apo nëse diçka e bën që të mos ndihet mirë.
Këto janë disa këshilla dhe rregulla që duhet patjetër t’ia mësoni fëmijës suaj, në qoftë se atë e leni vetëm në shtëpi. Dhe nëse ai nuk i di këto patjetër duhet të qëndrojë dikush me të, ose dërgojeni te të afërmit tuaj.

ZERI INFO