Celulari e shpëton shqiptarin nga vdekja

Një i ri shqiptar është qëlluar me armë, po fatmirësisht celulari që kishte në xhepin e xhaketës e ka devijuar plumbin, duke e plagosur

Një emigrant shqiptar në Itali është qëlluar me armë ditën e sotme, por fatmirësisht i ka shpëtuar vdekjes falë celularit që kishte në xhepin e xhaketës. Mediat italiane bëjnë të ditur se celulari në xhepin e 28-vjeçarit shqiptar ka bërë që plumbi të devijojë dhe ai të plagoset.

Ngjarja ka ndodhur mëngjesin e sotëm, në Napoli. Policia italiane ka arrestuar Alessandro Di Costanzo, 43 vjeç, i cili akuzohet se qëlluar me armë ndaj 28-vjeçarit shqiptar, për t’u hakmarrë për një zënkë mes dy fëmijëve të protagonistëve.

Emigranti shqiptar është dërguar menjëherë në urgjencë dhe i është nënshtruar një operacioni që i ka hequr plumbin. Sipas mjekëve, bëhet fjalë për një plumb 7.65 milimetërsh.

I arrestuari mësohet se ka bashkëpunuar me policinë e Aversas, ndërsa u ka dorëzuar edhe armën e krimit, një pistoletë.

/Shekulli Online/ E.L./