I dënuari me vdekje i shpëton litarit në minutën e fundit

Iran - Kur ndjeu litarin rreth qafës, i dënuari me vdekje, i quajtur Balal, duhet të ketë menduar se ajo ishte fryma e tij e fundit. Disa minuta më parë, turma e kishte parë duke ecur me rojet që po e shoqëronin për tek vendi i ekzekutimit publik.

Disa vite më parë, Balal, tani 20 vjeç ka vrarë një 18-vjeçar gjatë një grindjeje në rrugë në qytetin e vogël Royan, në Iran.

Familja e viktimës do të merrte pjesë në ekzekutim, për të shtyrë karrigen ku ai do të qëndronte. Por ajo që ndodhi ishte diçka e rrallë në historinë e ekzekutimeve në Iran, një vend që dënon me vdekje më tepër sesa Kina. E ëma e viktimës u afrua, e qëlloi me shuplakë në fytyrë dhe pastaj vendosi që ta falte vrasësin e të birit. Ndërsa i ati i viktimës e hoqi litarin nga qafa e tij. Më vonë, e ëma e Balalit përqafoi nënën që ishte në zi për të birin. Të dyja gratë qëndruan të përqafuara, njëra pasi e kishte humbur djalin, ndërsa tjetra, pasi i ishte shpëtuar.

Vitet e fundit, Irani është përballur me kritika nga aktivistët për të drejtat e njeriut, për nivelin e lartë të ekzekutimeve. Sekretari i OKB-së, Ban Ki-moon, ka akuzuar Hassan Rouhan-in për faktin se ka bërë shumë pak për përmirësimin e të drejtave të njeriut në Iran. Sipas Amnesty International, besohet se vitin e shkuar janë bërë 199 ekzekutime, ose afërsisht 2 persona çdo ditë.

/Shekulli Online/L.B./