Mbani në duar… bebin tuaj të palindur

Çasti kur nëna mban për herë të parë në duar fëmijën e saj, është konsideruar si unik dhe i pazëvendësueshëm, jo rrallë herë është përshkruar dhe poetikisht nga mijëra prindër anembanë botës. Nëse nuk je bërë prind është e vështirë të përshkruash dhe ndjesh magjinë e atyre çasteve të cilat të ndërrojnë jetën rrënjësisht. Tani, me ndihmën e teknologjisë bashkëkohore prindërit kanë mundësinë të mbajnë në pëllëmbën e dorës… bebin e tyre të palindur. Bëhet fjalë për një software që përdor dizanjuesi Brazilian Jorge Lopes, i cili lejon skanimin elektronik tredimensional të embrionit që ndodhet ende në mitrën e nënës së tij. Në vazhdim, në bazë të të dhënave të skanimit, krijohet një “model” plastik i embrionit. Teknika e re u karakterizua si fillestare dhe tepër e vlefshme nga mjekët gjinekologë, që vizituan një ekspozim në Royal College of Art të Londrës, ku u realizua dhe prezantimi i teknikës së re. Aktualisht, metoda konkrete zbatohet në një klinikë të Rio De Janeiro-së në Brazil, ndërkohe qe Lopes tha se një gua e verbër shtatzënë kërkoi zbatimin e teknikës me qëllim që të “shihte” me… duar bebin e saj të palindur.