Vladimir Prifti premton një film për Skënderbeun

Regjisori Vladimir Prifti pohon se i ka hyrë një projekti madhor. Do të realizojë filmin dokumentar mbi “Skënderbeun”. Është i pari i kësaj gjinie për heroin kombëtar. Projekti i miratuar nga Qendra Kombëtare e Kinematografisë bën pjesë në filmat e veçantë që do të shfaqen me rastin e 100-vjetorit të shpalljes së pavarësisë, më 2012-n. Prifti do ta realizojë në produksion me shtëpinë filmike “Eurofilm”. E ka ndërtuar strukturën, ka gjetur bashkëpunëtorët dhe shpreson që brenda muajit qershor të fillojë xhirimet. Fakti që për Skënderbeun ka dokumente të shumta arkivore, aq sa e ndihmojn dhe ia bën më të vështirë punën përzgjedhëse. Duke u shprehur se filmi do t’i qëndrojë besnik fakteve historike, regjisori Vladimir Prifti garanton shikuesit për një këndvështrim të ri në këtë dokumentar. Në karrierën e tij, regjisori njihet për realizimit e filmave, artistikë dhe dokumentarë që e kanë marrë fillin nga historia si “Udha e Shkronjave”, “Kush vdes në këmbë”, “Dasma e Sakos” e filmat dokumentarë “Butrinti”, “Të bekuarit”, “Legjenda e baltës”, “Rruga Egnatia”.