PS “fiton” Elbasanin, kryeson në Tiranë, Durrës e Korçë, PD fiton në Lezhë

TIRANE – Lajmifundit – UPDATE Ora 10:42 – Të dhënat e fundit që mbërrijnë nga qendrat e numërimit në KQZ, konfirmojnë vazhfimin e garës së fortë në Tiranë dhe thellimin e diferencës mes Vangush Dakos dhe Ferdinand Xhaferrajt në Durrës.
Sipas të dhënave fundit, Edi Rama ka tani 86199 vota, Hysni Milloshi ka marrë 946 ndërsa Lulzim Basha ka 85769 vota.
Diferenca mes Ramës dhe Bashës, në këtë rast është 430 vota. Nga ana tjetër, në qytetin e Korçës, PS ka thelluar diferencën me Partinë Demokratike pasi kandidati Niko Peleshi i opozitës, ka marrë 15594 vota ndërsa Andrea Mano, ka marrë 13414 vota.
Në Elbasan është në avantazh Qazim Sejdini me 13562 vota me mbi 4 mijë vota më tepër se kandidati i PD-LSI. Në Durrës, Ferdinand Xhaferraj ka marrë 15472 vota ndërsa kandidati i PS, Vangjush Dako ka marrë 16547 vota.
Në Lezhë, ku eshte mbyllur votimi, ka fituar kandidati i PD-LSI, Viktor Tusha që ka marrë 4933 vota kundrejt rivalit të PS, me 4631 vota.