Pele: Barcelona më e mira në botë, Messi jo më i miri

Legjenda e futbollit brazilian, Pele, nuk i pranon vleresimet se argjentinasi i Barcelonës, Lionel Mesi (në dy vitet e fundit i shpallur si futbollisti më i mirë në botë), e meriton kandidaturën për t’u shpallur futbollisti më i mirë në histori.
“Njerëzit janë të prirur të bëjnë krahasime. Por, kam përshtypjen se shumëkush ka harruar se si kanë luajtur futboll Johan Krojf, Mishel Platini apo Alfredo Di Stefano. Të gjithë ata ishin më të mirë se sa Lionel Mesi”, ka theksuar 70-vjeçari Edson Arantes do Naskimento, i njohur si Pele, për të përditshmen kiliane “La Tercera”.
Pele ka dhënë parashikimin e tij edhe për finalen e Ligës së Kampionëve, ndërmjet Barcelonës dhe Mançester United, që zhvillohet më 28 maj në “Wembley”. “Mançester United është skuadër shumë e fortë, e cila i ka mbetur besnike lojës me stilin anglez. Mirëpo, unë nuk kam as më të voglin dyshim se cila skuadër është më e mira në botë. Ajo është Barcelona”, ka thënë Pele.