Mjeku përzë kryeministrin nga dhoma

Sat 18 Jun 2011 - 12:11

Episod vërtet kurioz ka ndodhur në një spital të Londrës, aty ku kryeministri David Cameron është bërë protagonist i pësimit të një përzënie me bërtitje nga një mjek i “Guy's hospital”.

Ortopedi David Nunn me një ton tepër të irrituar i ka kërkuar si kreut të qeverisë, ashtu edhe zëvendësit të tij Nick Clegg që të largohen menjëherë nga dhoma ku ata po vizitonin një të sëmurë, përderisa s’kishin ndjekur procedurat e spitalit dhe kishin shkelur rregullat e higjienës “Më flani, por unë jam shefi i këtij pavioni dhe ju nuk mund të qëndroni në këtë mënyrë këtu!. Duhet të dilni menjëherë”, ka deklaruar ai me pak fjalë.

Një situatë, para të cilës Cameron është ndjerë në siklet, aq sa ka ftuar të largohen gazetarët e kameramanët që po filmonin këtë vizitë të tij.

Ndonëse mund të duket i bujshëm, faktikisht bëhet fjalë për një moment, që tregon vërtet se kush e bën ligjin nëpër institucionet, në të cilat është caktuar të “bëjë ligjin”.

Diçka që funksionon thuajse gjithmonë në vende të tilla demokratike si Britania. Po e a imagjinoni dot që diçka e ngjashme të ndodhë edhe në Shqiperi? Kushedi ç’do të kishte pësuar mjeku, nëse do t’i fliste në mënyrë të tillë kryeministrit, presidentit, apo qoftë edhe ndonjë zyrtari të thjeshtë... Ju si mendoni?