Grabisnin apartamentet, pranga dy shqiptarëve në Itali

Agustin Doda 23 vjeç dhe Arben Loci 32 vjeç, të dy emigrantë shqiptarë në Itali u arrestuan sot nga policia vendase pasi tentuan të hyjnë në një banesë në rrugën “Liguria” në Rexho Emilia.
Policia italiane tha se një fqinj i pronarit të apartamentit që po grabitej ka njoftuar shërbimet e rendit në lidhje me ngjarjen.
Policia organizoi më pas aksionin për kapjen e shqiptarëve. Sipas policisë italiane punonjësve të policisë u është dashur që të ngjiten nëpër tubin e gazit për të kapur një prej shqiptarëve që ishte brenda në shtëpi.
Agjentët e policisë e kanë ndjekur me vrap 23-vjeçarin Agustin Doda deri sa e kanë kapur në një prej rrugëve të qytetit. I dyshuari tjetër 32-vjeçari Arben Loçi është kapur në flagrancë brenda në banesë. Të dy qytetarët shqiptarë kanë qenë me dokumente të rregullta qëndrimi në Itali.