Kosovë, meshë solemne në përvjetorin e Nënë Terezës

Në 14 vjetorin e vdekjes së Nënë Terezës, sot në katedralen e Prishtinës, në kuadër të festës së Nënës Terezë, u mbajt një meshë solemne, e organizuar nga Ipeshkvia e Kosovës.
Mesha u drejtua nga delegati apostolik i Papës, shkëlqesia e tij Imzot Juliusz Janosz.
“Jam i sigurt se dashuria juaj për Kishën dhe per Papën do të jetë e durueshme dhe e mirëfilltë në proceset e stabilizimit të gjendjes politike dhe kishtare” tha mes të tjerash Imzot Janosz.
Të pranishëm në Festën e Nënës Tereze ishin edhe përfaqësues nga institucionet e Kosovës dhe misioneve ndërkombëtare, por edhe Arqipeshkvi i Tivarit , Zef Gashi.
Nënë Tereza ka lindur në Shkup në vitin 1910, dhe vdiq me 5 shtator të vitit 1997 në moshën 87 vjeçare. Ajo kaloi 45-vjet në shërbim të plotë të varfërve, të të sëmurëve, jetimëve duke ofruar dhe kërkuar ndihma për ta në mbarë botën. Në vitin 1979 ajo mori Çmimin Nobel për Paqe.