Gjermani, policia arreston 4 islamistë

Policia ka arrestuar katër islamistë të dyshuar në landin e Renanisë Veriore – Vestfalisë dhe të Hesenit. Tre persona janë arrestuar përkohësisht në Bon dhe i katërti në Ofenbah, vuri në dukje Zyra Qendrore e Policisë në Këln.
Njoftimet, sipas të cilave arrestimet janë bërë në kontekstin e festimeve që po zhvillohen në Bon me rastin e 3 Tetorit, ditës së ribashkimit të Gjermanisë, nuk janë konfirmuar. Sipas të dhënave të policisë të katër personat të moshës 22 deri në 27 vjeç kanë lindur në Gjermani.
Për ta dyshohet, se kanë bërë përgatitje për një akt penal me rrezik për shtetin, pasi ata kishin siguruar armë në mënyrë ilegale, thuhet më tej. Në Bon të hënën (03.10.2011) zhvillohet ceremonia kryesore e ditës së ribashkimit. (DW)