Modelja reklamon partinë e Putin: Seks në dhomën e votimit! Le ta bëjmë sëbashku!!

Më parë ato janë parë duke larë makinat e herë tjetër duke hequr rrobat. Gjithçka ka patur vetëm një objektiv, të bëjnë fushatë për të promovuar partinë dhe politikanin Vladimir Putin. Ushtria e modeleve të kryeministrit rus ka nisur një tjetër fushatë sulmi me një reklamë të re me tinguj të muzikës tekno. Në spot inkurajohen qytetarët rusë të marrin pjesë në zgjedhjet parlamentare të 4 dhjetorit. Oferta e fundit në spot është një vajzë e re e cila e veshur me një fustan të shkurtër shihet duke hyrë në një qendër votimi. Vajza merr fletën e votimit dhe ndërsa shkon për të hyrë në dhomën e fshehtë përplaset me një djalë. Duke ndjekur parimin femrat përpara, djali pret jashtë dhomës por brenda pak sekondash hapet perdeja dhe vajza tërheq brenda djalin. Më pas kamera fikson një plan të poshtëm ku duken këmbët e të dyve ndërsa rrobat bien në tokë. Në këtë moment në ekran shfaqet slogani “le ta bëjmë sëbashku”. Më pas hapet perdeja dhe që të dy dalin, hedhin votat në kuti dhe largohen dorë më dorë.