Pogradec, helmimi i tre fëmijëve, mjekët, jashtë rrezikut

Tre fëmijë janë helmuar gjatë ditës së sotme në një kopësht në qytetin e Pogradecit. Ngjarja ka ndodhur në fshatin Leshnicë të Pogradecit, ku sipas burimeve nga policia mësohet se janë helmuar tre fëmijët, ku më pas janë dërguar menjëherë nga edukatoret për të marrë ndihmën e parë mjekësore.

Dyshimet e para të ngritura nga policia është se ata mund të kenë konsumuar bar miu por kjo nuk është konfirmuar akoma nga mjekët specialistë. Ndërkohë që mjekët e spitalit të Pogradecit pohojnë se fëmijëve po u bëhet lavazh dhe më pas do të shihet se çfarë kanë konsumuar.


Policia e këtij qyteti ka nisur hetimet duke pyetur edukatoret e këtij kopshti mbi ushqimin që fëmijët kanë konsumuar. Ndërkohë që sipas policisë mësohet se fëmijët mund ta kenë gjetur lëndën helmuese në koridorin e kopshtit dhe pa e ditur se çfarë është e kanë konsumuar.

Ndërkohë që mjekët e spitalit të këtij qyteti bëjnë më dije se gjendja e fëmijëve është jashtë rrezikut për jetën. Ndërsa ata vazhdojnë të jenë nën mjekim intensiv në këtë spital. /albeu.com/