Operacioni, policia bllokon 27 makina të vjedhura, 4 në pranga

TIRANË- 52 makina të bllokuara, nga të cilat 27 të vjedhura jashtë vendit, dhe 4 persona të arrestuar është bilanci i operacionit ‘Vjeshtë 2011’ të ndërmarrë nga Policia e Shtetit.

“Janë kontrolluar dhe janë kryer verifikimet për përkatëse për rreth 432 automjete të ndryshme, nga të cilat janë bllokuar 27 automjete pasi nga verifikimi në sistemin e Interpolit kanë rezultuar të vjedhura jashtë vendit. Nga ky operacion janë bllokuar gjithashtu edhe 25 automjete të tjera, të cilat nga verifikimet e kryera kanë rezultuar me mangësi në dokumentacion”,- bëri me dije zëdhënsësja për mediat e Policisë së Shtetit.

Ndërkohë mësohet se gjatë kontrollit të policisë është bërë e mundur që të bllokohen dhe 4 armë zjarri pistoleta të llojeve të ndryshme, si dhe një sasi e konsiderueshme municioni, për të cilat janë arrestuar në flagrancë 4 shtetas. Operacioni i Policisë së Shtetit do të vijojë në të gjithë qytetet e vendit.

27 AUTOMJETET QË KANË REZULTUAR TË VJEDHURA JASHTË U GJETËN NË:
- Berat, 7 automjete
- Korçë, 4 automjete
- Elbasan, 4 automjete
- Vlorë, 2 automjete
- Tiranë, 6 automjete
- Shkodër, 2 automjete
- Lezhë, 2 automjete
- Fier, 1 automjet
- Gjirokastër, 1 automjet

(el.me/BalkanWeb)