Temperaturat siberiane mbërthejnë Kosovën, ndërpritet mësimi javën e ardhshme

Prishtinë, 5 shkurt 2012, NOA – Moti siberian i ditëve të fundit me reshje të dendura dëbore dhe temperatura tejet të ulëta me disa gradë nën zero ka goditur edhe Kosovën, raporton agjencia e lajmeve NOA.al.

Reshjet e dëborës kanë sjellë bllokimin e rrugëve në Pejë, Junik, Kaçanik, e Deçan, që bëjnë pjesë në rrafshin e Dukagjinit, si dhe Gjakovë, Klinë e Istog, por jo vetëm.

Mediat kosovare bëjnë me dije se 400 persona janë bllokuar në fundjavë në kompleksin turistik në Brezovicë nga reshjet e dëborës, mes tyre edhe shumë nxënës të shkollës fillore “Hasan Prishtina”, që ishin aty në një ekskursion fundjave.

REL raporton se organet komunale dhe ato të mirëmbajtjes së rrugëve po punojnë për çlirimin e rrugëve nga dëbora në mënyrë që turistët të kthehen në shtëpitë e tyre.

Instituti Meteorologjik i Kosovës paralajmëroi se temperaturat do të shënojnë rënie gjatë javës që po vjen, kur pritet që termometri në zonat malore të shënojë nga -18 gradë celsius deri në -22 gradë celsius.

Reshjet e dendura të dëborës dhe temperaturat e ulëta kanë sjellë ndërprerjen e mësimit nëpër disa shkolla fillore dhe të mesme.

Ministria e Arsimit për shkak të të ftohtit në të gjithë Kosovën dhe bllokimit të rrugëve nga bora, vendosi që javën e ardhshme të ndërpritet mësimi në të gjitha shkollat fillore dhe të mesme në tërë territorin e Republikës së Kosovës.

Autoritetet e Arsimit në Kosovë vendosën që mësimi në Kosovë të rifillojë të hënën më 13 shkurt 2012.

mit/NOA

Awwwaaaa,do na ngrij fare bora!!!

Po ktej nga ne si sra kjo bora e madhe pasi e kam qejf