Maqedoni-Shqipëri, lëvizje me letërnjoftime

Tue 28 Feb 2012 - 20:26

Marrëveshje për lëvizje të lirë mes qytetareve të Maqedonisë dhe Shqipërisë drejtë finalizimit. Kjo marrëveshje sot mori bekimin e Komisionit për politikë të jashtme pranë Kuvendit republikan. Sipas këshilltarit shtetëror në Ministrinë e Jashtme, Zvonimir Popoviq, përvoja pozitive e zbatimit të një marrëveshjeje të ngjashme mes Maqedonisë dhe Serbisë ka iniciuar edhe nënshkrimin e një marrëveshje të ngjashme edhe me Republikën e Shqipërisë.
“Ministria e Jashtme duke u nisur nga përcaktimet për gjetjen e mundësive për lehtësimin e lëvizjes së qytetarëve të Republikës së Maqedonisë dhe të qytetarëve të shteteve të fqinjësisë, por duke pasur parasysh edhe përvojat pozitive nga zbatimi i marrëveshjes së ngjashme me Republikën e Serbisë, inicioi nënshkrimin të marrëveshjes edhe me Republikën e Shqipërisë me të cilën mundësohet që qytetarët e dy shteteve mund të hyjnë, të dalin, të transitojnë dhe të qëndrojnë edhe me letërnjoftime biometrike valide”, tha Zvonimir Popoviq, këshilltar shtetëror në Ministrinë e Jashtme.
Marrëveshja do të hyjë në fuqi menjëherë pasi të kalojë edhe në seancën plenare të Kuvendit, dhe më pas të shpallet edhe në gazetën zyrtare të RM-së.
Ndryshe mes Maqedonisë dhe Shqipërisë për momentin është në fuqi marrëveshja e nënshkruar në Tiranë më 19 gusht të vitit 2008, e cila parasheh lëvizje të ndërsjellë të qytetarëve të dy shteteve pa viza. Nga Ministria e Jashtme njoftojnë se marrëveshje të ngjashme do të nënshkruajnë dhe me shtetet tjera. Partneri i shqiptarë i koalicionit qeveritarë BDI, ka deklaruar se nga kjo nismë nuk përjashtohet as Kosova, por paraprakisht duhet të plotësohen disa kushte nga kosovarët, gjegjësisht të pajisen me letërnjoftime biometrike. Bedri Rexhallari