Ahmeti: ‘Incidentet, akte të ulëta dhe qyqare’

Lideri i Bashkimit Demokratik për Integrim (BDI) Ali Ahmeti ka dënuar edhe një herë incidetet e fundit mes nxënësve të dy komuniteteve më të madhe në vend, shqiptarëve dhe maqedonasve. Ahmeti ka kërkuar nga uniformat ‘blu’ që të garantojnë sigurinë e qytetarëve.“BDI ka dënuar dhe dënon akte të tilla, akte qyqare, akte të ulëta, që rrezikojnë jetën e njerëzve po edhe njëherit frikësojnë, i vë në panik të gjithë qytetarët e Maqedonisë. Kemi kërkuar dhe kërkojmë që drejtësia të vendoset në vend, policia e shtetit e inkurajojmë që të kryejë punën e vet dhe drejtësia të veprojë mbi çdo kë që siguron qetësinë dhe sigurinë e të tjerëve. Qasja të jetë mbi të gjithë njësoj dhe të mos veprohet në mënyrë selektive”, deklaroi Ahmeti.

Sipas tij incidentet e fundit ishin spontane dhe pas tyre nuk qëndron asnjë parti politike.

“Çdo familje, çdo mësues edhe ato janë pjesë e kësaj shoqërie, të gjithë duhet të angazhohemi, që këto akte të tilla të dënohen dhe mos lejohet të ndodhin në të ardhmen. Të gjithë prindërit duhet të jemi të shqetësuar që gjëra të shëmtuara të mos ndodhin dhe të gjitha forcat politike duhet të veprojnë me përgjegjësi. Ne kemi bërë analiza të thella duke pasur parasysh të dhënat që marrim nga terreni ne na rezulton se pjesa dërmuese e këtyre aktiviteteve janë spontane dhe nuk qëndron asnjë forcë politike, por shfrytëzoj rastin që të gjitha forcat politike në vend duhet të kontribuojnë në ndërtimin e marrëdhënieve ndëretnike sepse nga raportet ndëretnike varet shumë ardhmëria e vendit tonë”, tha Ahmeti.

Ahmeti këto komente i bëri pas takimit me ambasadorin amerikan në Shkup, Poll Uollers./Express.mk