Zvicra, marrëveshje me Maqedoninë për emigrantët ilegalë

Shkup, 17 mars - Zvicra me Maqedoninë kanë nënshkruar të premten një marrëveshje për kthimin në Maqedoni të emigrantëve që jetojnë ilegalisht në Zvicër, njoftoi Byroja Federale për Migracion.

Kjo marrëveshje e zëvendëson marrëveshjen e mëparshme të arritur në vitin 1998 në mes të këtyre dy shteteve, transmeton Albinfo.

Marrëveshja është nënshkruar nga ministrja maqedonase e punëve të brendshme, Gordana Jankullovska dhe ambasadori i Zvicrës në Maqedoni, Stefano Lazaroto.

Marrëveshja rregullon pranim-dorëzimin reciprok të shtetasve të vet nga të dy shtetet. Po ashtu, me këtë marrëveshje mund të kthehen edhe persona nga shtete të treta ose persona pa shtetësi.

Deri më tash Zvicra ka nënshkruar marrëveshje të tilla me 45 shtete.