Goranët e Kosovës marrin pasaporta bullgare

Autoritetet bullgare kanë nisur një fushatë për pajisjen e komunitetit goran në Kosovë me shtetësi dhe pasaporta bullgare.
Sipas burimeve të agjencisë së lajmeve INA, përfaqësues të Qeverisë bullgare theksojnë se komuniteti goran është me origjinë bullgare dhe jo maqedonase dhe se atyre i ofrohen pasaportat joshëse me qëllim të mundësisë më të mirë për t`u punësuar në vendet e BE-së.
Gjithashtu ofertat janë edhe për të rinjtë goranë, të cilëve u mundësohen bursa falas për studime në universitetet e Sofjes dhe Plovdivit.
Shqetësimi rreth kësaj është paraqitur edhe nga një shoqatë Maqedono-gorane, me ç`rast përfaqësuesi i saj, Avni Rahti, ka deklaruar se deri tani mbi 100 goranë janë pajisur me shtetësi bullgare, që, sipas tij, i takojnë komunitetit maqedonas.
Ai ka deklaruar se për çdo ditë rritet numri i atyre që deklarohen për bullgarë, dhe se tashmë është vënë edhe një linjë udhëtimi nga Dragashi deri në Sofje. /ina/