Obama i ofroi shtratin e tij Kameronit

David Kameron ka rrëfyer se ishte “ftuar në shtratin” e Presidentit Obama në “Air Force One”, gjatë vizitës së tij shtetërore në SHBA. Kryeministri britanik tha se Obama i kishte afruar atij shansin për të përdorur shtratin e tij personal, pasi kishin parë një ndeshje bejsbolli. “Ishte ora 04:00 e mëngjesit me orën britanike, kur Obama tha ‘David, pse nuk përdor shtratin tim për t’u çlodhur’, dhe kështu bëra”, tha Kameron duke vazhduar se “Barak shkoi në fund të avionit dhe i shpjegoi ekipit tim se ‘Kryeministri britanik është shumë mirë, sapo e futa në shtrat’”. Ai tha se për shumë vite kjo do të ishte një anekdotë speciale për periudhën e tij si Kryeministër. “Ne kujtuam historinë e Uinston Çërçill, kur qëndronte në Shtëpinë e Bardhë dhe ishte në tualet. Ruzvelt kishte hyrë brenda dhe Çërçill ishte ngritur në këmbë, duke thënë “Kryeministri britanik nuk ka asgjë për të fshehur nga Presidenti i SHBA-ve”, tha Kameron.