E vërteta e ndërtuesit të raketave të Hitlerit

Triumfi më i madh në historinë e teknikës i përket atij. Ai ka fituar garën më të ethshme dhe më të gjatë të të gjitha kohërave, garën për hapësirën. Bëhet fjalë për Wernher von Braun. Ai lindi më 23 mars, 100 vjet më parë.

Fisniku gjerman ndërtoi raketat Saturn, që dërguan mes viteve 1969 dhe 1972 astronautët amerikanë në Hënë.

Sovjetikët, deri në atë kohë rivalët më të ashpër, nuk ia dolën. SHBA arriti në këtë mënyrë të gjunjëzojë Bashkimin Sovjetik.

Michael Griffin, ish- drejtor i NASA-s, thotë: “Është e qartë, Shtetet e Bashkuara nuk do kishin shkuar kurrë në hënë po të mos ishte për ekipin e Wernher von Braun”.

Kapsulat Apollo mund t’i ndërtonte kushdo, por ishin raketat Saturn të Braun që mundësuan uljen në Hënë. Vetëm një skuadër që kishte eksperiencë dhjetëravjeçare në këtë fushë mund të bënte të mundur diçka të tillë. Raketa Saturn ishte 111 metër e lartë.

“Akoma nuk kemi diçka më të mirë,” thotë ish- shefi i NASA-s. “Nëse do kishim sërish atë ekip, tani do ishim në Mars”.

Eksperiencë dhjetravjeçare? Sigurisht që ish- shefi i NASA-s flet për karrierën e hershme të Braun. Ai punoi për të ndërtuar raketën V2, që Hitleri do e hidhte mbi Londër.

Për ndërtimin e tyre në fakt u vranë më shumë njerëz sesa nga goditjet e tyre. 12 mijë njerëz vdiqën gjatë kësaj kohe. Një e vërtetë e hidhur që zotërinjtë e kollarisur të viteve ’60 në SHBA e mbajtën në hije.

Menjëherë pas luftës, ai bashkë me ekipin e tij me mbi 100 persona u largua për në SHBA. Aty bënë realitet thënien e Kenedit se shumë shpejt SHBA-të do dërgonin njeriun e parë në Hënë.

Buzz Aldrin, astronauti që u ul në Hënë më 20 korrik 1969 tha se triumfi amerikan ishte një goditje fatale për Bashkimin Sovjetik.

I lindur në Prusi, djali i një ish- ministri të Republikës së Vajmarit, vdiq në moshën 65 vjeçare.