Një asteroid sa aeroplani do të “fluturojë” sot në “afërsi” të Tokës

Një asteroid me madhësi sa një aeroplan do të “fluturojë” të dielën, më 1 prill në afërsi të Tokës, por nuk ka frikë se ai do të ndeshet me tokën, ka njoftuar Agjencia amerikane për gjithësi NASA.

Asteroidi i quajtur 2012 EG5, i gjerë diku rreth 50 metra, do të fluturojë afër tokës rreth orës 09.35.

"Asteroidi 2012 EG5, në mënyrë të sigurt do të kalojë përballë Tokës më 1 prill”, kanë shkruar në faqen e tyre në Twiter shkencëtarët e Programit për përcjelljen e asteroideve në NASA.

Ky asteroid do t’i afrohet Tokës më së shumti 230.000 kilometra, që është më pak se gjysma e largësisë të Tokës nga orbita e Hënes.

Asteroidi 2012 EG5 është i treti asteroid relativisht i vogël, i cili i afrohet tokës në 7 ditët e fundit.