“Geminoidi F”, roboti më “human” që flet e këndon

Duket aq shumë si njeri, sa në panairin ku u paraqit askush nuk po e besonte se në fakt krijesa që këndonte para tyre, apo qeshte dhe fliste, ishte një robot. Krijesa që mund të përdorë 65 shprehje fytyre, ka mahnitur njerëzit në Kinë. Geminoidi F mund të prodhojë buzëqeshje, madje edhe shprehje enigmatike, duke përdorur aktuatorë (imitim muskujsh) mekanikë nën “lëkurën” e saj prej gome. Krijuesi i saj tha se qëllimi ishte të krijonin një robot që mund të “mashtronte” njerëzit duke u dukur si një prej tyre. Geminoidi F u krijua nga Hiroshi Ishiguro, një dizajnues i njohur robotësh në universitetin “Osaka” në Japoninë e jugut. Androidët e tij kanë një kosto prej 1.2 milionë dollarësh. Por “Geminoidi F” kushton vetëm 110.000 dollarë. Ajo mund të buzëqeshë, të rrudhë vetullat dhe të lëvizë gojën, edhe pse në përgjithësi duket e gëzuar. Ajo mund të flasë dhe këndojë, duke përçuar zërin e njerëzve të tjerë.