99-vjetori i emetimit të pullës së parë shqiptare

Tiranë, 5 maj 2012, NOA - Posta shqiptare ka festuar 99-vjetorin e emetimit të pullës së parë shqiptare, e cila daton më 5 maj të vitit 1913, raporton agjencia e lajmeve NOA.al.

Ky përvjetor është i rëndësishëm edhe në kuadër të aktiviteteve për kremtimin e 100-vjetorit të Pavarësisë.

Drejtori i Postës Shqiptare Arqile Gorea e cilësoi pullën si një simbol dhe gur kilometrik të historisë sonë.

Gorea tha se “me emetimin e pullës së parë zuri fill edhe filatelia kombëtare, e cila ka qenë kurdoherë pjesë shprehëse e identitetit kombëtar”.

Pulla e parë shqiptare, kjo që shihni në foto, u emetua 6 muaj pas shpalljes së Pavarësisë së vendit.

Ajo kishte formën e një vule me ngjyrë të zezë, me të cilën u shtypën 2232 zarfa me ngjyra të ndryshme.

Kjo pullë kushtonte 1 grosh dhe u nxorr në shitje në 11 qytete të vendit, ku funksiononin zyrat postare.

mit/noa.al