Teatri Kombëtar, sot debutimi në Globin e Shekspirit

Teatri Kombëtar i Shqipërisë ka sot pasdite, ora 14.30, debutimin historik në skenën Glob të Teatrit të Shekspirit në Londër. Me “Henri VI”, pjesa II, trupa përfaqëson Shqipërinë në Festivalin Globe to Globe, ku 37 trupa nga e gjithë bota paraqitet me një vepër të Shekspirit. Festivali është në kuadër të Lojërave Olimpike Londër 2012.

“Henri VI” me regji të Adonis Filipit u shfaq premierë në Tiranë më 4 maj. Ishte një prodhim serioz në disa drejtime, por shfaqja nuk kishte arritur pjekurinë e plotë sidomos në drejtim të tekstit. Përkthimi i dramës historike të Shekspirit tingëllonte i huaj dhe i ftohtë në gojën e aktorëve.

Pas dy shfaqjeve në Londër, sot e nesër, trupa rikthehet për disa javë në skenën e Teatrit Kombëtar në Tiranë.

Pjesë e parë e “Henri VI” që luhet nga Teatri Kombëtar i Beogradit është shfaqur dje, ndërsa pjesa e tretë që i është besuar Teatrit Kombëtar të Bitolës, shfaqet sot dhe nesër, pas prezantimit të Shqipërisë.