Kosovë, dorëzohen eshtrat e 12 personave

Ekspertë mjeko-ligjorë të misionit EULEX, në bashkëpunim me kolegët e Departamentit të Mjekësisë Ligjore të Kosovës, dorëzuan sot mbetjet mortore të 12 personave tek familjarët e tyre.

Lajmi është bërë i ditur përmes një komunikate për shtyp të misionit evropian, në të cilën saktësohet se eshtrat u përkasin personave të zhdukur gjatë luftës.

Sipas burimit, të cituar nga “REL”, 10 nga 12 mbetjet trupore janë nxjerrë nga varrezat sekondare në Serbi dhe identifikimi i tyre është kryer, por është mbajtur sekret nga ekspertët në të familjarëve.

Ndërkohë, gjatë javës së ardhshme ekspertët do të dorëzojnë mbetje të tjera trupore, thuhet më tej në komunikatën zyrtare të misionit EULEX.

Sipas saj, që kur ky mision bashkoi përpjekjet me ato të Departamentit të Mjekësisë Ligjore, familjeve të ndryshme u janë dorëzuar mbetjet mortore të 308 personave.

Më herët gjatë muajit çështja e personave të pagjetur u kërkua të vendoset si kusht në bisedimet Kosovë-Serbi nga opozita kosovare, e cila e konsideron atë si një çështje jetike.

Partia në pushtet, PDK, nuk arriti të rrëzonte në Kuvend mocionin që i kërkonte qeverisë kushtëzimin e bisedimeve me zbardhjen e plotë të fatit të rreth 1.800 personave të zhdukur prej më shumë se një dekade.

Kjo solli reagimin e përfaqësuesit të posaçëm të Bashkimit Evropian në Prishtinë, Samuel Zhbogar, që deklaroi se dialogu mes Kosovës dhe Serbisë duhet të vazhdojë pa kushte.