Zvicra do tatojë depozitat gjermane, i hapet rruga Greqisë

ATHINE
- Hapet rruga për tatimin e depozitave greke në bankat e Zvicrës, pas
marrëveshjes së arritur ndërmjet Bernës dhe Berlinit, mbi tatimin e
depozitave gjermane në këtë vend.

Zvicra miratoi marrëveshjen
ndërqeveritare me Gjermaninë mbi tatimin e depozitave gjermane në vend,
tatim që do të arrijë edhe në 41%. Sipas marrëveshjes, taksimi për
llogaritë e huaja do të fillojë që në krye të vitit 2013. Ndërkohë
Zvicra refuzon automatikisht të shkëmbejë informacion mbi depozituesit e
huaj dhe për këtë arsye marrëveshja ndërshtetërore parashikon pagimin e
taksës duke ruajtur anonimitetin e depozitave.

Ekspertët
zviceranë nuk janë dakord për publikimin e identitetit të depozituesit
të shumave, pasi sipas tyre, publikimi i identitetit do të trondiste
besimin e klientëve të bankave të Zvicrës.

Ky zhvillim
konsiderohet pozitiv për interesat greke, pasi që nga viti 2010 edhe
Greqia është në negociata me autoritetet zvicerane për përfundimin e
marrëveshjes ndërqeveritare të ngjashme me atë mes Zvicrës dhe
Gjermanisë, që do të çojë në tatimin e depozitave greke në bankat
zvicerane.

«Financial Times Deutschland» shkruante se 200
miliardë euro janë depozituar nga grekët në bankat e Zvicrës, ndërsa
disa burime flasin edhe për 600 miliardë euro. Me arritjen e një
marrëveshje të tillë, Athina pretendon të luftojë evazionin fiskal dhe
krimin ekonomik, pasi ato miliarda karakterizohen kryesisht si "para e
zezë", fitime nga korrupsioni dhe evazioni. Nëse arrin të tatojë
depozitat e grekëve në Zvicër, Greqia do të marrë taksa të rëndësishme
të zhdukura për disa vite, duke mbyllur ndoshta një nga "vrimat" në
arkën e saj të buxhetit.