Orët e Putinit kushtojnë 6 herë më shumë se paga e tij vjetore

Presidenti rus, Vladimir Putin, ka një koleksion orësh që vlen rreth 600 mijë euro, që do të thotë gjashtë herë më shumë se paga e tij vjetore zyrtare. Një nga orët, e punuar me platin dhe me rrip lëkure krokodili, vlen të paktën 300 mijë euro. Ajo quhet “Tourbograph” dhe është krijuar nga prodhuesit gjermanë të “A Lange & Sohne”. Zbulimi i këtyre orëve ka ngritur pyetjen se si mund ta përballojë Putin një koleksion të tillë, me të ardhurat që siguron. Detajet e koleksionit të Vladimir Putin u publikuan në një video të prodhuar nga grupi opozitar rus, “Solidariteti” të postuar në “YouTube”. Video, e titulluar “Orët e Kleptokratit”, kanë në sfond fjalimin e Putinit, ku thotë se do të vazhdojë luftën kundër korrupsionit, si një nga prioritetet e tij. Ora e Putinit bie më kontrast të plotë me orën që mban Presidenti i Shteteve të Bashkuara, Barak Obama, një orë që kushton rreth 250 euro.