Greqia në zi: 2-3 vetëvrasje në ditë

Kriza ekonomike në të cilën ndodhet Greqia, duket si një situatë pa kthim.

Një situatë e cila ka dalë jashtë kontrollit me një qeveri që luan rolin e një spektatori dhe kurrsesi të paktën rolin e një këshilltari, e aq më keq të ndihmojë qytetarët e saj. Populli helen, citon alb-observer.com, si pasojë e papunësisë së madhe ka rënë në depresion!

Shifrat e larta të papunësisë, rënia e tregut, mungesa e kredive, tërheqjet e kapitaleve nga bankat greke si dhe presioni i rëndë psikologjik që u bë gjatë dy muajve të shkuar, sidomos nga dy ish-partitë e mëdha në vend, me shantazhet sabotuese, se nëse populli nuk votonte një nga këto dy parti, do të dilte jashtë eurozonës dhe se në vend do të pasonte kaosi, mjaftoi që qytetarët e këtij vendi të humbasin kontrollin dhe t’i drejtohen…
vetëvrasjeve!

Statistikat e fundit rreth fenomenit të vetëvrasjeve në vend janë shokuese, pothuajse çdo ditë humbasin jetën 2-3 biznesmenë, të cilët të ndodhur në udhëkryq e në mëshirë të fatit, zgjedhin rrugën e vetëvrasjeve si zgjidhjen më të mirë.
Ndërkohë prekës janë dhe reagimet e disa grupeve në sajtet sociale, si facebook, të cilët kanë publikuar disa fotografi që me përmbajtjen e tyre të tronditin.

Mjafton të citosh ato çka kanë shkruar në to dhe do të kuptoni gjithçka:
“Greqia në 2012-ën. 2-3 vetëvrasje në ditë. Nëse nuk ekzistojnë fajtorët, atëherë nuk ka dhe drejtësi”./alb-observer.com/