Lazarat, policia ndalon 12 punëtorë kanabisi dhe 4 bote uji

Sat 14 Jul 2012 - 10:35

GJIROKASTËR-Vijojnë operacionet antikanabis në Lazarat. Policia ndaloi sot 12 punëtorë që ujisnin kanabisin si dhe 4 autobote uji .

Edhe gjatë ditës së sotme në aksin rrugor Kordhocë deri në brendësi të fshatit Lazarat forcat e drejtorisë së Policisë së Qarkut Gjirokastër, të mbështetura nga FNSH dhe Delta Forcë kanë patrulluar me qëllim bllokimin e cdo automjeti që transporton ujë, pleh organik apo baltë për në fshatin Lazarat me qëllim kultivimin e kanabisit, si dhe për bllokimin e fuqisë punëtore që tenton të hyjë në Lazarat për këtë qëllim .

Në këtë kuadër të këtij operacioni edhe gjatë ditës së sotme në vendin e quajtur Pularia në hyrje të fshatit Lazarat, forcat e policisë kanë nxjerrë jashtë funksionit katër depozita të mëdha që shërbenin për grumbullimin e ujit nga puset dhe më pas për të mbushur botet me ujë, si dhe ka nxjerrë jashtë përdorimit katër bote pa asnjë dokumentacion, ku gjatë operacionit drejtuesit e automjeteve braktisën botet dhe u larguan me shpejtësi në brendësi të fshatit

Nga të dhënat qe disponojnë Specialistët për Parandalimin dhe Hetimin e Krimit ne Komisariatin e Policisë, Gjirokastër, drejtuesit e boteve i përdornin këto automjete pa asnjë lloj dokumentacioni dhe asnjë kushti teknik vetëm për transport uji duke ua shitur me leke disa banorëve me qëllim kultivimin e kanabisit.

Nga ana e Policisë po punohet për dokumentimin ligjor dhe për kapjen e drejtuesve të autoboteve që i braktisen.

Gjithashtu edhe gjatë paradites se sotme janë shoqëruar 12 punëtore, të cilët tentonin të hynin në Lazarat. Ata mësohet se kanë qenë edhe herë të tjera të shoqëruar në ambjentet e Drejtorisë së Policisë së Qarkut Gjirokastër dhe ndaj ketyre shtetaseve filloi procedimi penal në gjendje të lirë.

(d.b/BalkanWeb)