Arrestohet babai që hodhi të birin nga kati i katërt i maternitetit

Me gjithë përpjekjet e mjekëve, foshnja që u hodh nga kati i katërt i maternitetit në Tiranë, nuk mundi t’i rezistojë plagëve të marra dhe i mbylli sytë përgjithmonë.

Ky vogëlush që kishte vetëm pak ditë që kishte ardhur në jetë u hodh nga dritarja e maternitetit nga vetë babai i tij.

Shtetasi Hysen Biba, pas një sherri me bashkëshorten e tij lehonë, ka rrëmbyer foshnjen dhe e ka hedhur nga dritarja.

Më pas është larguar me automjetin e tij, por është arrestuar nga policia rreth dy orë më vonë në Kamëz. Për arrestimin e autorit të këtij akti barbar ka ndihmuar edhe vëllai i tij.

Nëna fatkeqe e vogëlushit ndodhet në gjendje shumë të rëndë psikologjike dhe është nën kontrollin e mjekëve.

(lajmi i mëparshëm)

Një ngjarje e paprecedent ka tronditur mbrëmjen e sotme maternitetin “Koço Gliozheni” në kryeqytet. Një person i sapo bërë prind, ka hedhur nga dritarja e katit të katërt e maternitetit foshnjen e porsalindur dhe më pas është larguar në drejtim të panjohur.

Policia që mbërriti menjëherë në vendngjarje, arriti të identifikojë babanë e foshnjes, i cili është shpallur person në kërkim.

Ende nuk janë të qarta shkaqet që e shtynë këtë prind të ndërmarrë një veprim kriminal. Foshnja është në gjendje të rëndë shëndetësore dhe mjekët po bëjnë përpjekje të mëdha për ta mbajtur në jetë. /alb-observer.com/

Qe nga titulli nis gabim , duhet te ish "monstra" e jo babai .