AK: Bashkëpunimi PD-PS, turp kombëtar

Tiranë, 6 shtator 2012, NOA- Aleanca Kuq e Zi deklaroi se gjatë ditës së sotme shqiptarët do të jenë dëshmitarë të takimit të radhës të Këshillit Legjislativ ku do të diskutohen ndryshimet Kushtetuese të nevojshme për heqjen e imunitetit të zyrtarëve dhe politikanëve të vendit tonë.

“Aleanca Kuq e Zi e konsideron “bashkëpunimin” PD-PS turp kombëtar i cili ka kaluar të gjithë caqet e moralit politik të liderëve të partive-pushtet madje tashmë dita-ditës vetëm përpiqen ti hedhin hi syve shqiptarëve me deklarata farsë të ndërsjella, e ndërkohë marrëveshjet mes tyre po rrezikojnë seriozisht të ardhmen Europiane të vendit tonë. Viti 2112 shënon një bilanc tragjik të nënshtrimit të Partisë Socialiste e cila i ka dhënë konsensus Berishës në 100% të projektligjeve të paraqitura nga qeveria”, deklaron AK, raporton noa.al.

Në vijim cilësohet si tragjedi kombëtare fakti që opozita e vendit shitet dhe blihet në tavolinat e kafeneve të Tiranës nga pazaret e Sali Berishës i cili për të mbajtur pushtetin me çdo kusht është i gatshëm të ndjekë modelin grek të qeverisjes të PASOK me Demokracinë e Re.

Aleanca Kuq e Zi thekson se nuk është kundër heqjes së imunitetit të zyrtarëve por se kundërshtohet fakti që kjo kërkesë modeste e Bashkimit Europian të kthehet në Ligjin Omerta të mafies nëpërmjet të cilës sigurohet heshtja dypalëshe për krimet e njëra tjetrës.

Aleanca Kuq e Zi deklaron se në këtë 100 vjetor populli shqiptar do t’i japë kësaj klase politike që ka ndjell përçarje dhe ndasi në jetën e çdo shqiptari përgjigjen e merituar duke i premtuar publikut se do hap dosjet kriminale të dy palëve.

a.y/noa.al