Qeveria: Nëse nuk i japim detin Greqisë, na bllokon si Maqedoninë

Qeveria shqiptare druhet se Greqia do e bllokojë procesin e integrimit të Shqipërisë drejt BE në rast se nuk i japim detin. Këtë fakt e ka bërë të ditur Ministria e Jashtme në një raport që u ka shpërndarë deputetëve të Komisionit të Jashtëm.

Sipas Shqip, në raport thuhet se Greqia nuk pranon rinegocim dhe është gati që të bllokojë integrimin e Shqipërisë në Bashkimin Europian nëse nuk pranohet marrëveshja e nënshkruar mes Lulzim Bashës dhe Dora Bakojanis.

Një skenar që del në skenë, sipas Ministrisë së Jashtme, është që Greqia të vijojë të respektojë në heshtje këtë marrëveshje, e cila është hedhur poshtë nga Gjykata Kushtetuese. Qeveria shqiptare do të heshtë dhe Greqia do vijojë të marrë detin tonë në qetësi.

Skenari i tretë është që marrëdhëniet me Greqinë të acarohen, dhe ky është skenari më ekstrem.

Në të gjitha rastet Greqia duket më superiore. Duke mos pranuar rinegocimin, Greqia e ka futur vendin tonë në një spirale. Prandaj nuk ishte çudi që Panariti deklaroi dje se marrëveshjen me Athinën mund ta bëjë edhe qeveria e re në vitin 2013. Është një patate e nxehtë në dorën e gjithkujt.
(Tema)