Hasan Prishtina në Shkup pas 100 vjetësh

Busti i Hasan Prishtinës është gati për tu vendosur në udhëkryqin përpara qendrës tregtare Mavrovka. Busti tre metra i lartë është punuar nga skulptori nga Tirana Artan Peqini. Ai kap vlerën 72 mijë euro dhe është donacion i fondacionit “Hasan Prishtina”, që kryesohet nga Mehmet Prishtina, familjar i Hasan Prishtinës. Busti do të vendoset në Shkup, më 14 tetor, në 100 vjetorin e Kuvendit të Shkupit ku kalohet nga kërkesa për autonomi në kërkesën për Pavarësi. Kreu i Komunës së Çairit Izet Mexhiti, nën iniciativën e të cilit është edhe ky projekt tha momentalisht po punohet në bazamenti i cili do të jetë i lartë 2 metra. “Iniciativa është e komunës së Çairit është një veprimtari e përbashkët publiko- private ku përmendorja është donacion nga Mehmet Prishtina ndërsa rregullimi i sheshit, bazamentit dhe disa aktiviteteve që mbahen gjatë vendosjes së përmendores janë nën patronazh të komunës së Çairit është një veprimtari e përbashkët e komunës dhe trashëgimtarit të Hasan Prishtinës”, tha Mexhiti. Mehmet Prishtina i cili përfaqësoi familjen e Hasanit tha se vlera e projektit kushton 72 mijë euro me një lirim nga 10 për qind nga autori i cili është autor i tre shtatoreve të Hasan Prishtinës, asaj që u vendos në rektoratin e Universitetit të Prishtinës, kësaj në Shkup dhe asaj që pritet të vendoset në Tiranë në muajin nëntor.