Ndryshon matura shtetërore. Dy provime me zgjedhje

Matura shtetërore do të ketë ndryshime për vitin e ardhshëm shkollor. Të rinjtë që do të kandidojnë për në universitete do t’u nështrohen dy provimeve me zgjedhje dhe jo tre si vitin e kaluar. Zyrtarët e Ministrisë së Arsimit thonë se skema që u përdor gjatë 2012 për pranimet nuk rezultoi ashtu si pritej, prandaj ndryshoi, citon albanianscreen.

“Jo më pak se tetë kredite dhe numri i lëndëve që do të zgjidhen janë vetëm dy. Nuk mund të japin tre sepse veprimet që u bënë vjet nuk na sollën ndonjë gjë të re. Kishte mbingarkesë për nxënësit. Kishte një mendim, interpretim, një këshillim jo të mirë për këto maturantë që zgjidhën tre duke menduar se do të marrin më shumë pikë, por formulat ishin të tilla që nuk të krijonin mundësinë për të marrë më shumë pikë”- tha Fatmir Vejsiu, drejtor i arsimit parauniversitar në MASH.

Ndërkohë për kandidatët që kanë dhënë provimet me zgjedhje vitin e kaluar do të ketë disa kritere.

“Kur maturanti ka dhënë tre dhe nuk ka fituar asnjë nga këto provime ose një provim ai do të japë domosdoshmërisht ose dy ose dhe një tjetër. Nëqoftëse maturani ka fituar dy provime ai mund të hyjë në lojë dhe po të dojë mund të japë edhe një tjetër. Pra kjo është fakultative”- tha Vejsiu.
Ndryshime të tjera të maturës kanë të bëjnë me reduktimin e numrit të lëndëve mes të cilave duhet të zgjedhin të rinjtë. Ato do të jenë vetëm 26 lëndë, pasi një rigrupimi të disa lëndëve të ngjashme në një të vetme. Zyrtarët në Ministrinë e Arsimit thonë se ndryshimet nuk do të penalizojnë të rinjtë, por ato janë të nevojshme për të përmirësuar cilësinë e prurjeve në universitete.

ju uroj susese te gjithe maturanteve